خاک سورج سے اندھیروں کا

خاک سورج سے اندھیروں کا ازالہ ہوگا
آپ آئیں تو میرے گھر میں اُجالا ہوگا

عشقِ سرکار کی اِک شمع جلالو دل میں
بعد مرنے کے لحد میں اُجالا ہوگا

حشر میں اُن کا ہر اِک چاہنے والا ہوگا
میرے سرکار کا عالم ہی نرالا ہوگا

حشر میں ہوگا وہ سرکار کے جھنڈے کے تلے
میرے سرکار کا جو چاہنے والا ہوگا

آنہیں سکتا نظر جلوہٴ سرکار کبھی
بے یقینی کا اگر آنکھ میں جالا ہوگا

کل وہ سرکار کے دامن میں نظر آئے گا
جس کے عیبوں کو زمانے نے اُچھالا ہوگا

حشر میں اُس کو بھی سینے سے لگائیں گے حضور
جس گنہگار کو ہر ایک نے ٹالا ہوگا

جب بھی مانگو تو وسیلے سے اُنہیں کے مانگو
اِس وسیلے سے کرم اور دوبالا ہوگا

سر جھکائے گا وہ سرکار کے قدموں میں ضرور
جس کا مقصود بھی اللہ تعالیٰ ہوگا

ہوگا سیراب سرِ کوثر و تسنیم وہی
جس کے ہاتھوں میں مدینے کا پیالا ہوگا

ہر ضرورت پہ کفالت کی نظر ہے تیری
اور تجھ سا نہ کوئی پالنے والا ہوگا

ماہِ طیبہ کی تجلی بھی نرالی ہوگی
آپ کے گرد بھی اصحاب کا ہالا ہوگا

صلۂ نعتِ نبی پائے گا جس دن خالد
وہ کرم دیکھنا تم دیکھنے والا ہوگا