جہاں روضہٴ پاک خیر الوریٰ ہے

جہاں روضہٴ پاک خیر الوریٰ ہے وہ جنت نہیں ہے تو پھر اور کیاہے
کہاں میں کہاں یہ مدینے کی گلیاں یہ قسمت نہیں ہے توپھر اور کیا ہے

محمد کی عظمت کو کیا پوچھتے ہو کہ وہ صاحبِ قابہ قوسین ٹھہرے
بشر کی سرِ عرش مہماں نوازی یہ عظمت نہیں ہے تو پھر اور کیا ہے

جو عاصی کو دامن میں اپنی چھپالے جو دشمن کو بھی زخم کھا کر دعا دیں
اُسے اور کیا نام دے گا زمانہ وہ رحمت نہیں ہے تو پھر اور کیا ہے

قیامت کا اِک دن معین ہے لیکن ہماری لیے ہر نفس ہے قیامت
مدینے سے ہم جانثاروں کی دوری قیامت نہیں ہے تو پھر اور کیا ہے

تم اقبال یہ نعت کہ تو رہے ہو مگر یہ بھی سوچا کہ کیا کر رہے ہو
کہاں تم کہاں مدحِ ممدوحِ یزداں یہ جراٴت نہیں ہے تو پھر اور کیا ہے